Ils 20 d'avrigl ha puspè ars il «Böögg» a chaschun da la festa tradiziunala «Sächsilüüte» a Turitg. Pli spert ch'il chau da la poppa preparada explodescha, e pli bella che la stad duai vegnir. Era sche questa tradiziun populara n'ha tenor Meteo Svizra anc betg pudì vegnir verifitgada, crain blers Turitgais e Turitgaisas en questa tradiziun.
Quest onn è il «Böögg» explodì suenter be 12 minutas e 48 secundas. Quai che munta tenor tradiziun ch'i dat ina bella stad quest onn.
En il quiz dad RTR è stada il pli datiers Chiara Caviezel da Laax ch'ha inditgà ch'il «Böögg» explodescha suenter 12 minutas e 52 secundas, pia be 4 secundas dasperas! Uschia ch'ella dastga sa legrar dal premi, ina entrada per l'entira famiglia (geniturs ed uffants) per il zoo da Turitg. Cordiala gratulaziun!
Vulais savair dapli da l'usit, lura avain mess ensemen in vast matg d'infurmaziuns dal «Sächsilüüte 2026», però era da la tradiziun istorica sco tala.
