La Svizra ed era il Grischun han profità ils ultims dus onns dal turissem indigen ed en quest stil duai cuntinuar. Quai è stà il tenor a la radunanza generala da l'organisaziun Grischun Vacanzas ad Arosa.
Via communabla è la dretga via
La strategia per las destinaziuns turisticas è clera era per il futur: Ir la via communabla. Da quest avis èn plirs turistichers che RTR ha dumandà a l'inscunter ad Arosa, er suenter che la vischnanca da San Murezzan vuless extrar da la destinaziun turistica Engiadina San Murezzan.
Optimistic per la stad
Grischun Vacanzas e persvas ch'i dettia era quest onn ina buna stad per il turissem grischun. Ins mettia vinavant sin valurs existentas: La natira, la bella cuntrada, viandar, ir cun bike e l'autenticitad dal chantun. Sumegliant tuna era tar differentas destinaziuns turisticas dal chantun. Ins stoppia dentant era restar innovativ ed avert per innovaziuns. Surtut la persistenza è in tema che occupa singulas destinaziuns.
