La Partida populara svizra dal Grischun ha decedì las parolas per las votaziuns federalas dals 28 da november:
- Na a l'iniziativa da tgira
- Na a la lescha da Covid-19
Nagina parola ha la partida decidì en connex cun l'iniziativa da giustia, quai per betg surchargiar la saira da delegadas, uschia ha ditg Jann Thöny sin dumonda. La parola vegnian els probabel anc a prender en la direcziun da la partida.
La partida grischuna è cunquai sin lingia da la partida-mamma: La PPS da la Svizra cusseglia da metter trais giadas in Na en l'urna la fin dal mais.
Tar l'emprima votaziun davart la lescha da Covid-19 era quai anc stà auter: La PPS svizra aveva dà liber la vusch e la PPS dal Grischun avevan recumandà in Na.
Thomas Gort daventa president intermediar
Thomas Gort è il nov president intermediar da la PPS dal Grischun. Il president da Küblis e deputà en il Cussegl grond è vegnì elegì a la radunanza da delegadas e delegads a Trun. Thomas Gort duai distgargiar il president actual Roman Hug durant ses cumbat electoral per in sez en la regenza grischuna.
Ed in ulteriura midada ha la PPS annunzià: Valérie Favre-Accola banduna la direcziun da la partida suenter esser stada engaschada là durant 14 onns. Ella dovria temp per sia candidatura sco presidenta dal cussegl d'administraziun da Tavau Claustra Turissem, è vegnì argumentà. Favre-Accola resta dentant deputada e vice-presidenta da la fracziun en il Cussegl grond.
Sin in clic tut las fatschentas federalas e communalas: rtr.ch/votaziuns