L'advocat tudestg Hanno Berger, ch'è en praschun a Cazas, duai vegnir extradì a la Germania. La disposiziun saja vegnida relaschada ils 20 d'avust ha l'Uffizi federal da giustia communitgà a l'agentura da novitads tudestga DPA. Il biro d'advocatura che represchenta Berger n'ha betg vulì dir sch'els fan recurs. 391 milliuns euros duain Hanno Berger e ses cumplizs avair raffà dal fiscus tudestg cun cugliunarias da «cum-ex».
Dapi sia fugia avant radund 10 onns viva l'advocat a Zuoz. Ils 7 da fanadur ha la Polizia chantunala grischuna arrestà Hanno Berger. Uss sa chatta el en praschun a Cazas. Encunter quest arrest protesta Hanno Berger cun tut ils rampins giuridics pussaivels. Cun ses emprim recurs n'ha el gì nagin success. Il tribunal federal penal a Bellinzona ha refusà ses protest encunter l'arrest.
