A Malans haì dà en il ravugl da la scola 26 persunas ch'èn vegnidas testadas positiv. Da quai 25 uffants da la scola primara. Perquei resta la scola serrada enfin almain mardi saira ed ad interim vala en tut ils bajetgs in obligatori da mascra.
Las scolas da la citad da Cuira cumenzan pir a testar ils scolars l'entschatta settember. Era sch'i vala per il mument nagin obligatori da mascras en las scolas. Tenor il manader dal Departement da furmaziun da la citad da Cuira Patrik Degiacomi, dovri l'emprim la conferma dals geniturs. Survegnir lezza na saja, en il temp da vacanzas cun passa 3'000 scolaras e scolars, betg uschè simpel. I saja pli impurtant da cuntanscher uschè blers geniturs sco pussibel che da far uschè svelt sco pussaivel.
Da la vart dals geniturs sco era da scolastas e scolasts n'haja tenor Patrik Degiacomi betg dà ina reclamaziun ch'ils tests cumenzan pir l'entschatta settember. Era in obligatori da mascras saja vegnì considerà, ma quella mesira saja tenor el cun la situaziun actuala anc betg necessaria. La finala sajan era ils geniturs ch'èn stads en vacanzas responsabels da sa tegnair vid las mesiras da la Confederaziun ed ir sche necessari en quarantina u da sa laschar testar.
