Ils uffants en las scolas popularas grischunas sa sentan bain cun il model d'integraziun. Da quest avis è ina gronda part da las scolastas e dals scolasts che han fatg part ad ina retschertga da l'uniun «Magistraglia Grischun», la LEGR.
83% da las scolastas e dals scolasts èn da l'avis ch'il model d'integraziun è s'etablì e 79% han il sentiment ch'ils uffants sa sentian bain. Ina situaziun da pari datti dentant tar la dumonda, sche l'idea d'integraziun en scola porta avantatgs u dischavantatgs, sco l'uniun scriva en ina communicaziun. La maioritad è dentant da l'avis ch'i na dat nagina differenza tar il success d'emprender – independent sche l'instrucziun vegn fatga cun uffants integrads u betg.
In manco saja surtut il temp: La magistraglia e las pedagogas curativas dovrian dapli temp per coordinar ils uraris e la collavuraziun. In ulteriur problem che pudess surdumandar las scolas grischunas èn uffants cun difficultads da cumportament. Cunquai ch'il clom per sustegn daventia adina pli grond, saja il chantun obligà da schlargiar la purschida per identifitgar las sfidas gia en scolina e rinforzar la promoziun sociala.
Potenzial per scola secundara e reala
Malgrà la tenuta positiva suenter 10 onns integraziun da scolaras e scolars pli flaivels en la scola populara grischuna, vesan scolastas e scolasts differenzas: Entant ch'il model d'integraziun funcziuna bain per la scolina e scola primara – pretendan els per la scola secundara e reala schliaziuns individualas e vesan potenzial per meglieraments. Il nivel sin quest stgalim saja sa sbassà cun l'integraziun, uschia il fazit. Perquai exprima la magistraglia il giavisch per dapli gruppas ordaifer las classas.
