Siglir tar il cuntegn

Header

cuntegn

Segir en il traffic Responsabladad davos la roda da manar

Dastgar seser davos la roda da manar e charrar nua ch’ins vul, per blers è quai in sentiment d’independenza. Tgi ch’è saun po er charrar en auta vegliadetgna. Da valitar sez – a moda sincera – las atgnas abilitads da manischar in auto saja però essenzial.

Il clisché che senioras e seniors na giajan betg bain u betg segir cun auto na sa lascha betg giustifitgar a moda scientifica. Tenor Gianclaudio Casutt, ch’ha perscrutà co glieud pli veglia va cun auto sa mantegn questa fama per diversas raschuns. Per l’ina pateschian persunas pli veglias da pli grevas blessuras tar in accident, che persunas pli giuvnas e quai stoppian ins considerar. Per l’autra vegnia il test medicinal ch’automobilistas ed automobilists ston far il pli tard cun 75 connotà negativ. Uschia partia la societad dal fatg ch’i saja problematic d’ir cun auto en la vegliadetgna. Scientificamain na saja quai però betg cumprovà, accentuescha Gianclaudio Casutt che lavura sco psicolog da traffic tar l'ospital chantunal Zug.

Senioras e seniors na chaschunan betg dapli accidents. En la statistica cumparan persunas pli veglias plitost sco unfrendas.
Autur: Gianclaudio Casutt psicolog da traffic

Stil da charrar sa mida

Conscient, u savens er betg conscient midia il stil da charrar cun ils onns. Sco il psicolog da traffic declera eviteschian senioras e seniors situaziuns hecticas, e quai saja er bun. Pertge gist en talas situaziuns – sco per exempel tar cruschadas cun plirs vials – sa sentian persunas pli veglias pli svelt surdumandadas e là dettia er pli savens accidents. Entras evitar talas situaziuns surpiglian senioras e seniors responsabladad, envers sasez sco er envers autras persunas en il traffic.

audio
Gianclaudio Casutt: «Senioras e seniors van segir cun auto»
ord Actualitad dals 01.02.2022.
laschar ir. Durada: 3 minutas 17 Secundas.

Er tenor Cla Schur, magister d’ir cun auto ed instructur per curs da segirezza, èsi impurtant d’esser conscient che tut na funcziuna en la vegliadetgna betg pli tuttina sco da giuven.

audio
Cla Schur: «L’impurtant è da betg spetgar enfin ch’insatge capita».
ord Actualitad dals 01.02.2022.
laschar ir. Durada: 3 minutas 54 Secundas.

Cunzunt ils curs da segirezza metta Cla Schur a cor a senioras e seniors. Là na vegnia controllà nagut, mabain trenà, accentuescha el. Per exempel vegnia trenà da far in stop andetg, da charrar sche l’auto glischna ed er ils agens reflexs possian ins observar. En pli cusseglia Cla Schur a tgi che na po betg pli manar il chau e guardar enavos sur la spatla da charrar pli paun e da duvrar dapli ils spievels. Er in auto ch’ha agids tecnics pudess esser d’avantatg.

RTR actualitad

Artitgels legids il pli savens