Siglir tar il cuntegn

Header

video
Nova partiziun d’urgenza per la clinica psichiatrica Waldhaus
Or da Telesguard dals 20.05.2022.
laschar ir. Durada: 2 minutas 18 Secundas.
cuntegn

Servetschs psichiatrics dal GR Sperdita malgrà blera lavur l'onn 2021

Malgrà blera lavur han ils Servetschs psichiatrics dal Grischun fatg l'onn passà ina sperdita da 250'000 francs. Sco l'instituziun scriva, n'hajan ins betg pudì cumpensar la sperdita dals products da nischa e dals servetschs che na portan betg sasez. L'onn 2021 haja dà prest 80'500 dis da tgira ed ina occupaziun dals letgs staziunars da radund 92%. Quai èn 9% dapli che l'onn avant. Ultra da quai avra l'instituziun la fin da matg a Cuira ina nova staziun d'urgenza per psichiatria generala en la clinica Waldhaus, quella ha plaz per 24 pazientass e pazients, sco era la staziun veglia.

Ils davos dus onns haja la pandemia purtà blera lavur a las staziuns staziunaras ed ambulantas dals Servetschs psichiatrics dal Grischun. Els han fatg ina svieuta da 107,7 milliuns francs. Tuttina ha quella summa betg pudì purtar ils custs da 108 milliuns.

audio
Nova partiziun d’urgenza per la clinica psichiatrica Waldhaus
ord Actualitad dals 20.05.2022.
laschar ir. Durada: 2 minutas 29 Secundas.

Nova staziun d'urgenza psichiatrica en la clinica Waldhaus

La fin da matg da l'onn current avra a Cuira ina nova staziun d'urgenza per psichiatria generala en la clinica Waldhaus che ha plaz per 24 pazientas e pazients. Quella staziun saja per persunas che dovrian ina tgira intensiva per problems acuts. La staziun saja per 24 uras e set dis ad emna averta. Il territori che l'instituziun cuvra tenor atgnas indicaziuns cun la nova purschida, saja il chantun Grischun, Glaruna sco er il Principadi da Liechtenstein. Per regla restan pazientas e pazients in mais en l'emprima staziun, la staziun d'urgenza. Silsuenter pon quellas persunas lura cuntinuar lur tractament en la psichiatria ambulanta u autras purschidas. La staziun ha custà 25 milliuns francs ed è vegnida construida aifer dus onns e 10 mais.

Architectura averta cun bler lain

L'architect Conradin Clavuot ed era ils responsabels han mess paisa sin ina architectura averta cun bler spazi, grondas autezzas ed era sin ina atmosfera chauda. Quai grazia a l'element da lain. Las colurs duvradas èn fitg decentas, ils bogns per exempel han ina colur da terracotta. Sin il tetg da l'edifizi sa chatta ina cuort cun in pitschen iert. Era impurtant saja quai stà, da construir las chombras e las recepziuns uschia ch'il persunal possia vesair cun ina egliada nua ch'ils pazients èn. En l'edifizi vegl che sa chatta en la chasa dasperas n'èra quai betg adina pussaivel, sco la schefmedia da la psichiatria generala, Peggy Stützer, ha declerà en la runda tras il nov edifizi.

RTR novitads 12:00

Artitgels legids il pli savens