Siglir tar il cuntegn

Header

cuntegn

Consequenzas da la pandemia Nova staziun da giuvenils a Cuira per cas urgents

Ils Servetschs psichiatrics dal Grischun PDGR han prendì en funcziun tar la clinica Waldhaus a Cuira ina nova staziun per giuvenils ed uffants. Quai per il tractament acut, scrivan ils servetschs psichiatrics. La staziun duai restar enfin il 2025.

Entras la pandemia da corona dovrian adina dapli uffants e giuvenils tractaments psichiatrics. Quest trend saja da percorscher en l'entira Svizra, scriva la PDGR. Sin la nova staziun «P1 akut» ch'ha avert las portas questa emna datti tschintg plazzas staziunaras cumplainas per giuvenils tranter 14 e 18 onns. Quels sajan per cas d'urgenza e distgargian las autras staziuns da la clinica Waldhaus. La collavuraziun cun la clinica per uffants e giuvenils Littenheid en il chantun Argovia cuntinueschia vinavant e saja da gronda impurtanza.

audio
PDGR: Nova staziun intermediara per uffants – pertge?
ord Actualitad dals 14.12.2021.
laschar ir. Durada: 2 minutas 12 Secundas.

Staziun transitorica

La nova staziun saja ina staziun transitorica enfin che la nova clinica d'uffants e giuvenils sin l'areal dal Waldhaus è a fin. Quella è actualmain en construcziun e duai esser pronta il 2025. Cumplementarmain a questa purschida resta la staziun averta per giuvenils en la chasa da terapia al Fürstenwald. Quella porscha set plazzar cumplainamain staziunaras per giuvenils tranter 12 e 18 onns. En il center dal tractament stattan qua terapias. Sin la staziun nova perencunter il tractament urgent.

22% dapli pazientas e pazients dapi la pandemia

Cunzunt las persunas tranter 15 e 25 onns pateschian fermamain da la pandemia da corona. Uschia han ils Servetschs psichiatrics dal Grischun nudà in augment da 22% en il sectur ambulant. En la pratica sa mussia che cunzunt uffants e giuvenils en famiglias che n'èn betg stabilas pateschan da las consequenzas da la pandemia. Studis mussian er che cunzunt mattatschas, dunnas giuvnas, persunas cun biografia da migraziun u talas ch'han gia gì problems psichics u finanzials èn tutgadas pli ferm da la situaziun actuala. Facturs da stress en quest connex sajan per exempel isolaziun, contacts che manchian, quitads per il futur u er conflicts en famiglia.

 

RTR novitads 11:00

Artitgels legids il pli savens

Scrollar a sanestra Scrollar a dretga