La situaziun actuala è stabila. Ils cas sa reduceschan, restan dentant vinavant sin in'aut nivel. La raschun per la reducziun dals cas possia dentant er esser il fatg ch’i vegn testà pli pauc. Per quest motiv saja en quest mument grev da far prognosas.
Actualmain fa il chantun anc tests regulars en 277 manaschis, cun var 9'500 collavuraturas e collavuraturs. Quai èn cunzunt manaschis en il sectur da sanadad, vul dir chasas da tgira, ospitals e clinicas.
Omicron n'ha anc betg cuntanschì ils ospitals grischuns
Levgià è il chantun era dal dumber da las ospitalisaziuns. La tema d'ina unda d'ospitalisaziuns n'è fin ussa betg sa cumprovada. Cuntrari, en las staziuns intensivas èn actualmain mo pazientas e pazients da l'unda da delta, dentant nagins cas d'omicron.
Igl è forsa in zic ina glisch a la fin dal tunnel
Il mument vegnan tgiradas 32 pazientas e pazients da corona en ospitals grischuns, 7 sin las staziuns intensivas. Radund 3'400 persunas sa chattan en isolaziun.
Quarantina vegn remplazzada tras tests
Il chantun Grischun è enconuschent ch'el è savens ì sia atgna via durant questa pandemia. Quai fa el er questa giada: la quarantina vegn de facto abolida. A partir dad immediat pon persunas che ston ir en quarantina sa laschar testar libramain. Vul dir: cun in test a partir da l'emprim ed in test l'ultim di da la quarantina po quella vegnir remplazzada. Il test sto dentant vegnir fatg tar ina persuna dal fatg.
Per Jamnicki è questa decisiun er in zic in pass en in futur cun corona, dentant senza grondas restricziuns. La controlla, sche persunas giajan propi en quarantina, na sappian els gia uss strusch far – il sa laschar testar saja dentant meglier che insumma nagut.
Problems tar il monitoring d'auas persas
In problem ha il chantun actualmain cun il monitoring da las auas persas ch'el ha lantschà durant l'onn passà. Fin uss haja quel represchentà detg bain il dumber d'infecziuns en il chantun. Uss saja quai però sa midà, ha ditg Martin Bühler, il schef dal stab directiv chantunal. Il dumber da cas dad omicron sajan bler pli aut che quai ch'il monitoring da las auas persas mussia effectivamain. Il mument sajan ins vi dal sclerir, daco e tge adattaziuns ch'ins stoppia far.
Il monitoring duai era dar en il futur, cura ch'ins fetschia forsa pli paucs tests che ussa. Fin uss saja quel numnadamain stà in bun med per analisar la situaziun e controllar il svilup da la pandemia.
