Elegia il Grischun dapli dunnas?
La resposta curta: Gea.
Per l'ina n'è la regenza grischuna betg pli in gremi masculin, sco dapi l'onn 2018 e quai grazia a Carmelia Maissen. Era sch'i fa surstar ch'ella è pir la terza dunna en questa funcziun e ch'i n'è anc gnanc uschè ditg enavos che l'emprima dunna è vegnida cussegliera guvernativa.
In sguard en auters chantuns mussa dentant: Era cun ina dunna en la regenza è il Grischun be insanua a mez la rangaziun svizra.
Per l'autra èsi era da constatar in svilup en il parlament: A partir da l'avust prendan 40 dunnas plaz en la sala dal Cussegl grond a Cuira.
Tgi profitescha dal proporz?
La resposta curta: Las partidas da pol (PPS e PS), dentant ...
Gea, la PPS ha gudagnà 16 sezs en il Cussegl grond ed è la gronda victura. Ella cuntanscha bunamain puspè la fermezza sco avant la separaziun da la PBD, quai mussa il sguard sin il svilup a lunga vista. E gea, era socialdemocrats (+9) e verd-liberals (+7) vegnan pli ferms.
Dentant: L'Allianza dal Center e la Partida liberaldemocratica n'han betg pers tant sco prognostitgà da las retschertgas e pon uschia anc adina cumandar las festas en il parlament.
Sch'ins guarda la repartiziun dals sezs sur 100 onns, lura ves'ins che las partidas s'avischinan, pia ch'ils extrems èn passads e che bleras partidas èn pli u main tuttina fermas actualmain en il Cussegl grond.
Co che la dumengia d'elecziuns ha tuttina scurlattà in u l'auter circul, è da leger qua:
Van dapli u pli paucs a l'urna?
La resposta curta: Ni l'in ni l'auter
I dat era statisticas che na sa midan para strusch. Ina da quellas è la quota da participaziun ch'è pli u main restada tuttina per la regenza grischuna. U ditg auter: Bun 60% da las persunas cun dretg d'eleger en il Grischun na fan betg diever da quel – independent da dunnas, sistem d'eleger e statisticas istoricas.