Suenter che Novartis ha annunzià da stritgar 1'400 plazzas en Svizra, crititgeschan ils sindicats fermamain il concern da farmazia. La federaziun «Emploiads Svizra» scriva en ina communicaziun che questa reducziun da plazzas saja senza senn da responsabladad. Quai en vista a las bunas perspectivas en la branscha.
Critica vegn er dal sindicat Unia. La pledadra da l'Unia, Daria Frick ha ditg en la Tagesschau da SRF, ch'i vesia ora sco sche las plazzas vegnissan stritgadas sur tut là, nua ch'i na dat nagin contract collectiv da lavur. Talas mesiras da spargn na possian betg vegnir purtadas a donn e cust dal persunal, di Frick.
Novartis stritga mintga 10. plazza en Svizra
Novartis relascha dapli che mintga dieschavel emploià ed emploiada en Svizra. I van a perder 1'400 da las 11'600 plazzas ils proxims trais onns. Sin l'entir mund stritga il concern da farmazia 8'000 da las total 108'000 plazzas. Novartis ha confermà sin dumonda dad AWP indicaziuns da las gasettas da TA-Media.
Il concern da farmazia aveva annunzià il cumenzament d'avrigl ina restructuraziun cumplessiva, cun la quala Novartis vul spargnar enfin il 2024 almain 1 milliarda dollars. La part principala da la restructuraziun è da metter ensemen las spartas «products da farma innovativs» e la sparta da medicaments cunter cancer. Da l'autra vart creescha Novartis la nova participaziun per strategia e svilup da l'interpresa.
Per mitigar las consequenzas negativas tar relaschadas saja Novartis gia en discurs cun las represchentanzas da collavuraturs e collavuraturas.
