Las ultimas emnas han millis possessuras e possessurs da dronas laschà registrar lur apparats. Dapi l’entschatta da l’onn valan en Svizra las reglas da l’Uniun europeica per dronas. Tranter auter ston ins registrar dronas cun 250 grams u dapli – u quellas cun ina camera. Per tschertas dronas dovri plinavant in examen. Tenor in pledader da la Confederaziun èn 10'000 dronas vegnidas registradas da nov e 10'000 persunas han fatg l’examen da pilot.
I dat era novas reglas per l'autezza da sgular e per sursgols. Plinavant valan uss er standards da segirezza per la producziun, la registraziun ed il diever da dronas.
