- La maioritad da la populaziun sustegna las schluccadas dal Cussegl federal dals 16 da favrer. Be 28% èn da l'avis ch'i giaja memia svelt, 39% fissan per schluccar anc pli svelt.
- 53% beneventan che l'obligatori da mascras vegn schlià, il medem mument è dentant la maioritad per in obligatori da mascrinas en butias ed il traffic public.
- En general è la populaziun stada uschè optimistica sco anc mai davart la fin da questa pandemia.
Dapi l'entschatta da la pandemia, avant dus onns, n'è l'optimissem davart il decurs e la fin da la pandemia betg pli stà uschè grond sco l'entschatta favrer 2022. 50% da las persunas dumandadas èn optimisticas u plitost optimisticas. Be pli 16% èn pessimisticas u plitost pessimisticas. Quai munta che la glieud è pli optimistica che la stad dal 2020, nua che blers han anc cartì ch'i pudess dar ina svelta fin. Il pli pessimistica era la populaziun l'atun dal 2020, nua che las cifras d'infecziun ed er dad ospitalisaziuns èn explodidas ed i na deva anc naginas vaccinaziuns.
Quest optimissem vegn partì da tuttas generaziuns. Dentant èn uss ils giuvens quels ch'èn pli optimistics ch'ils pli vegls. Uschiglio era quai repartì cuntrari, pia la glieud pli veglia ch'era pli optimistica ch'ils giuvens.
Malgrà l'optimissem quinta dentant anc adina ina maioritad da 51% cun ulteriuras mesiras da restricziuns per l'enviern proxim. Be 41% èn da l'avis ch'i na dettia lura naginas mesiras pli.
Potenzial da conflict puspè sa sminuì
Il dumber d'infecziuns ch'è s'augmentà, las restricziuns per persunas betg vaccinadas e la lescha da Covid davart la quala il pievel ha stuì votar, han chaschunà l'atun 2021 in'atmosfera tendida. Cumpareglià cun la retschertga dal fanadur 2021 (24%), han 45% da las persunas dumandadas temì conflicts en il conturn privat.
Malgrà che las restricziuns per persunas betg vaccinadas eran anc adina en funcziun cura che la retschertga è vegnida fatga, l'entschatta favrer, è il potenzial per conflicts en il conturn privat puspè sa reducì marcantamain sin 30%. La tema da conflicts n'è bain betg svanida, dentant sa reducida ferm. Il grond consentiment per la politica da corona da la Confederaziun haja sco para pudì gidar da quietar la situaziun.
A curta vista pon ils cumbats da votaziun en la democrazia directa augmentar il potenzial da conflicts. A media vista contribueschan quels dentant a l'integraziun sociala.
Populaziun suonda Cussegl federal
Gia avant che questa retschertga è vegnida realisada, aveva il Cussegl federal annunzià ch'el vul abolir las bleras mesiras da corona. Il ristg pli pitschen per in decurs grev da la malsogna tar la varianta omicron sco er il dumber da cas ch'èn sa sminuids, han chaschunà che l'opiniun da la populaziun è sa midada. Ina gronda maioritad sustegna il Cussegl federal e las mesiras ch'el aveva annunzià d'abolir. Be 28% da la populaziun eran da l'avis che l'executiva reageschia memia svelt. Cun 39% è la cumpart da persunas ch'èn da l'avis ch'il Cussegl federal avra memia plaun dentant in bun tant pli grond.
Insumma èn plitost las persunas sut 35 onns da l'avis ch'i giaja memia plaun cun schluccar. Il pli sceptics envers il tempo svelt èn las persunas dumandadas en la Svizra taliana. Ma er qua èn 42% da las persunas da l'avis ch'i fetschia senn da schluccar.
Grond sustegn per las schluccadas
Sch'i va per schluccar las mesiras en Svizra sustegna la gronda part da la populaziun ils pass ch'il Cussegl federal aveva proponì per ils 16 da favrer. Sulet las mesiras da testar vinavant sch'ins haja sintoms, e da restar en isolaziun cura ch'ins è testà positiv, vulan las bleras persunas anc mantegnair.
Dasper las mesiras gia decididas per l'entschatta favrer, sco l'obligatori da homeoffice, beneventa la populaziun il pli ferm da stritgar l'obligatori per certificats. 64% da las persunas dumandadas s'expriman cleramain per questa midada. Er ina maioritad stretga da 53% aveva beneventà l'idea d'abolir l'obligatori da mascrinas.
Naginas mascrinas e certificats pli
53% da las persunas dumandadas avevan inditgà da sustegnair sche l'obligatori da mascrinas vegniss schlià. Sch'i vegn dentant dumandà concret tenor la posiziun envers l'obligatori, respundan 55% ch'els èn da principi per in obligatori da mascrinas en butias. 61% sustegnan in obligatori da mascrinas en il traffic public. Bain ha l'obligatori pers simpatia, dentant datti anc adina punctualmain ina maioritad per quel.
Sumegliant guardia er ora per il certificat da Covid. Dad ina vart èn 64% en general per abolir l'obligatori. Il medem mument èn dentant 55% da principi per quel. Er questa tenuta mussa la flexibladad da la populaziun en il cas che la situaziun da corona sa pegiurass puspè.
