In segir provediment electric è la finamira principala dal nov cusseglier federal Albert Rösti. E per cuntanscher questa finamira vesa Rösti sco emprima prioritad dad extender las ovras idraulicas. Quai ch'haja cumenzà avant 150 onns cun bler spiert da pionier saja oz pli actual ch'insacura. Il project central en chaussa – la lescha federala davart in provediment segir d'electricitad cun energias regenerablas – saja sin buna via, dovria dentant anc correcturas.
In ulteriur accent da Rösti èn infrastructuras modernas – quai per ils meds publics sco er novas autostradas ed ina politica per l'entir pajais. Plinavant vul el far politica per l'entir pajais, pia per las agglomeraziuns e citads e per la champagna.
Rösti vul dapli ovras electricas da reserva
Rösti ha fatg cler ch’i dovria era mesiras a curta vista. Il proxim enviern na saja anc betg segir. El ha pledà per «anc dapli ovras electricas da reserva». Sco adina na dastgia il stadi da dretg dentant betg vegnir revocà. I dovria in «cumpromiss tranter interess da protecziun ed utilisaziun».
