Sco l'Uffizi federal per meteorologia MeteoSvizra ha communitgà, haja pluvì las davosas 72 uras 2,7 billiuns liters aua. Sisum la Surselva, en il chantun Tessin ed en la regiun dal Gottard hai dà 120 fin 200 millimeters. En il nord da las Alps eran quai 80 fin 120 millimeters.
Oz datti ina pitschna pausa, ma gia la notg sin dumengia vegn prognostitgà nova plievgia e per mardi quintan ils meteorologs che quella vegnia puspè intensiva. Davent da mardi vegn puspè prognostitgà plievgias intensivas quai tar temperaturas da 20 grads.
Plievgia chaschuna era impediments sin via
Al Lai da Thun ha la via a la riva dretga danovamain stuì vegnir serrada. La ferma plievgia dals davos dis haja procurà per ina situaziun geologica instabila. La via chantunala era vegnida averta pir dacurt, suenter ch'ina bova aveva sutterà ella venderdi en damaun.
