Ils trais cussegliers federals Simonetta Sommaruga, Alain Berset e Guy Parmelin èn s’inscuntrads la dumengia cun divers represchentants da la branscha da turissem. La finamira da l’inscunter cun ils turistichers è stada da discutar cun la branscha, co ch’ins po realisar vacanzas en Svizra.
Nus avain quaidas d’ina bella stad.
Suenter l’inscunter ha Sommaruga declerà, che tuts participants veglian la finala il medem: «Nus avain quaidas d’ina bella stad», haja ella ditg. Per cuntanscher quai, dovria dentant anc schluccadas.
Che «bler» vegnia ad esser pussibel a partir dals 8 da zercladur, ha ditg Nicolo Paganini, il president da la federaziun da turissem svizra. Er il president da Gastrosuisse, Casimir Platzer ha gì suenter l’inscunter la medema impressiun.
Gronda speranza per pendicularas e campadis
Avant l’inscunter eran las associaziuns perina che tant las pendicularas sco er las plazzas da campar duain pudair avrir en duas emnas.
Tge che vegn concret schluccà a partir dals 8 da zercladur, decida il cussegl federal mesemna proxima. Lura infurmescha el er en chaussa.
