Siglir tar il cuntegn

Header

video
La segunda retschertga da votaziun da l’institut Gfs Berna mussa ils trends per la votaziun dal mars
Or da Telesguard dals 21.02.2024.
laschar ir. Durada: 1 minuta 7 Secundas.
cuntegn

2. retschertga da votaziun Stretg Gea a la 13avla renta – cler Na a l'iniziativa da rentas

Trais emnas avant la votaziun vegniss l'iniziativa per ina 13avla renta da l'AVS acceptada stretgamain. L'iniziativa da rentas che vul augmentar la vegliadetgna da pensiun – però refusada cleramain. Quai mussa la segunda retschertga da l'institut Gfs Berna fatga sin incumbensa da la SRG SSR.

Ils 3 da mars votescha il suveran svizzer davart duas iniziativas en connex cun las rentas:

audio
2. retschertga da votaziun dals 3 da mars
ord Actualitad dals 21.02.2024. Maletg: RTR
laschar ir. Durada: 3 minutas 45 Secundas.

L'institut Gfs Berna ha fatg ina enquista dals 7 fin 14 da favrer che mussa tge che las persunas dumandadas avessan votà sch'i fiss stà da votar da lez temp. L'emprima enquista è stada mez schaner.

53% Gea ad ina 13avla renta d'AVS

L'iniziativa «Viver meglier en la pensiun» perda schlantsch. Entant che 61% dals dumandads e da las dumandadas avessan anc ditg Gea u plitost Gea mez schaner, èn quai tar la segunda retschertga mez favrer be pli 53%. Quai correspunda a la tendenza ch'iniziativas perdan per solit consentiment en il decurs dal cumbat electoral.

Sustegn chatta l'iniziativa per ina 13avla renta cunzunt en la Svizra taliana (79% Gea u plitost Gea) e tar ils Svizzers e las Svizras che vivan en l'exteriur (68% Gea u plitost Gea).

Interessant è il sguard sin ils arguments: 79% da las persunas ch'èn sa participadas a la retschertga èn da l'avis ch'ins stoppia meglierar la situaziun finanziala dals pensiunads. Ma tuttina na sa mussa quai betg uschè cler en la decisiun da votar. Il pli bler consentiment cunter l'iniziativa ha l'argument che la 13avla renta augmentass la taglia sin la plivalur e las contribuziuns da la paja.

La decisiun po vegnir stretga

Trais emnas avant las votaziuns è il consentiment per l'iniziativa sa diminuì. Quest trend po cuntinuar u che la campagna dals aderents po franar quel. Las datas mussan tenor l'institut da retschertga Gfs Berna ch'i pudess dar ina decisiun stretga – tant tar la maioritad dal pievel sco era tar la maioritad dals chantuns. Tar 10 chantuns mussan las tendenzas in Gea e tar 8 chantuns in Na. 5 chantuns, er il Grischun, èn intscherts uschia che la decisiun po esser stretga, tant Gea sco era Na. Decisiv saja, tge posiziuns che dumognan en il focus ed obtegnan dapli pais las proximas duas emnas.

Iniziativa da rentas perda cleramain

Il consentiment per l'iniziativa è sa reducì marcantamain dapi l'emprima enquista dal schaner. Trais emnas avant la votaziun avessan 63% da las persunas dumandadas dal Gfs Berna refusà l'iniziativa. Il schaner eran quai be 53%.

Prest tut las gruppas socialas e politicas èn tschiffadas dal trend da dir Na a l'iniziativa da rentas. Era las persunas pensiunadas ch'eran al cumenzament da la campagna anc per l'iniziativa, din uss per gronda par Na. Fitg cler refusan cunzunt era persunas da las partidas sanestras l'iniziativa.

Er ils arguments na persvadan betg

Passa dus terzs da las persunas ch'èn sa participadas suondan als arguments che l'iniziativa augmentass la malgistadad perquai che persunas cun buna paja possian anc adina laschar pensiunar pli baud che l'iniziativa ignoreschia ils problems da persunas pli veglias a la tschertga da lavur e che bleras persunas na possian betg lavurar pli ditg ord motivs psichics u fisics.

Entant na dat gnanc la mesadad dals participants e da las participantas il consentiment als arguments dal aderents. Pli paucs ch'anc tar l'emprima enquista pensan ch'i saja necessari d'auzar la vegliadetgna da renta per segirar la finanziaziun da l'AVS, che l'iniziativa saja in med cunter la mancanza da persunal qualifitgà e che la colliaziun da la vegliadetgna da renta cun l'aspectativa da vita saja faira e persistenta.

Auta participaziun a l'urna

En questa segunda enquista dal Gfs Berna è la prontezza da sa participar a las votaziuns anc creschida. Entant che 48% dals dumandads avevan inditgà da vulair votar il schaner, eran quai trais emnas avant la votaziun 52%. Quai è sur la media dals ultims onns. Tenor l'Uffizi federal da statistica è la participaziun a votaziuns tranter 2011 e 2022 tar 47,1%. En la mobilisaziun finala da la campagna vegn quintà che la valur s'augmentia uschia che Gfs fa quint cun in'auta participaziun a l'urna ils 3 da mars.

La retschertga

Avrir la box Serrar la box

L'institut da perscrutaziun Gfs Berna ha fatg la segunda retschertga en vista a las votaziuns dals 3 da mars per incumbensa da la SRG SSR. L'institut ha dumandà 19'105 votantas e votants tranter ils 7 e 14 da favrer 2024. La quota da sbagl munta a +/- 2,8 puncts procentuals.

RTR novitads 06:00

Artitgels legids il pli savens