Circa 1400 persunas giuvnas en la vegliadetgna tranter 14 e 24 onns han prestà il 2021 in servetsch agricul sin in bain puril. Ellas han prestà passa 21'000 dis da servetsch. Quai scriva Agriviva en ina communicaziun.
Quai èn 2% dapli che l'onn avant. Grond plaschair da quest augment ha l'organisaziun da non-profit Agriviva ch'organisescha ils servetschs agricols. Quels cuzzan tranter ina ed otg emnas. Per Ueli Bracher, il manader da fatschenta dalla Agriviva, èn quels servetschs agricols gist en il temp actual ina contribuziun impurtonta per mussar a la populaziun urbana co che la situaziun da viver da la populaziun è en regiuns rualas da la Svizra. Sco che l'organisaziun scriva sajan mintgamai mo ina giuvna u in giuven en servetsch tar ina famiglia purila. Uschia saja era stà pussaivel da risguardar las mesiras da protecziun da corona ed ins haja pudì cuntinuar cun la purschida senza pli gronds impediments.
Ils davos 75 onns han passa 300'000 giuvnas e giuvens profità dalla purschida e suvegnì in'investa en l'agricultura. Agriviva è vegnì fundà sco «Servetsch puril voluntari» 1946 ed ha avant 10 onns midà il num.
