Las elecziuns per las duas successuras en il Cussegl federal èn stadas in eveniment da questa sessiun d'enviern. Viola Amherd dal Vallais surpiglia il post da Doris Leuthard e Karin Keller-Sutter per Johann Schneider-Amman.
Tar la repartiziun dals departaments hai lura dà grondas discussiuns. Empè dal venderdi han ils cussegliers federals pudì sa cunvegnir pir il glindesdi a tgi che surpiglia tge post.
Revisiun da la lescha da CO2
11 uras è vegnì discutà vi e nà e decidì davart artitgel per artitgel e detagls da la lescha. La finala ha il Cussegl naziunal tuttina sbittà tutti quanti. La culpa vegn stuschada vi e nà tranter las partidas.
Uss sto il Cussegl dals chantuns pigliar a mauns anc ina giada l'entira revisiun. La Svizra è numnadamain s'obliada da reducir las emissiuns per 50%, cumpareglià cun il 1990, fin il 2030.
Pact da migraziun
Omaduas chombras han decidì ch'ellas vulan avair l'ultim pled davart il pact da migraziun da l'ONU. Cun quai è il plan dal Cussegl federal da vulair suttascriver il pact il mument mess sin glatsch. La regenza sto spetgar giu la debatta da l'onn proxim.
Na a liberalisaziun dals models d'eleger chantunals
L'avantmezdi ha il parlament ditg surprendentamain Na a la liberalisaziun dals models dad eleger chantunals. Surpendenta è la decisiun stada perquai che omaduas chombras avevan decidì en la debatta da laschar als chantuns maun liber co ch'i duai vegnir elegì – proporz, maiorz u ina maschaida.
Per il Grischun ina decisiun relevanta perquai ch'i vegn debattà dapi onns sch'il sistem da maiorz saja il dretg u betg.
RR actualitad 12:00