Siglir tar il cuntegn

Header

Video
Il dumber d'infecziuns cun il virus da corona crescha svelt
Or da Telesguard dals 04.03.2020.
laschar ir
cuntegn

58 cas confermads en Svizra Koch: «La situaziun è seriusa e vegn anc pli seriusa»

  • Ina persuna è entant morta da las consequenzas dal coronavirus. La dunna da 74 onns saja morta en in ospital en il chantun Vad.
  • 58 cas d'infecziun cun il coronavirus ha l'Uffizi federal da sanadad confermà fin mesemna saira.
  • Passa 30 ulteriurs cas (stan da mesemna da mezdi) èn testads positiv, dentant anc betg confermads dal labor da referenza a Genevra.
  • Var 300 persunas èn en Svizra en quarantina. Ed i dat 200 cas da suspect.
  • Enfin uss èn s'infectadas en Svizra surtut persunas pli giuvnas che viagian bler e betg persunas pli veglias ch'èn pli periclitadas.
  • I vala anc adina la mesira da la Confederaziun che occurrenzas cun passa 1'000 persunas èn scumandads. Tar occurrenzas cun dapli che 150 persunas dovri in'analisa da ristg.
  • En Grischun porta il chantun maun en dumondas sch'i n'è betg cler sch'ina occurrenza po vegnir manada tras u betg.
  • La Confederaziun ha decidì in'ulteriura mesira: Tegnair distanza, per exempel cura ch'ins stat en colonna avant ina cassa.

58 cas confermads

Sco quai che l'Uffizi federal da sanadad BAG scriva sin sia pagina d'internet datti la mesemna a las 17:15 en Svizra 58 cas confermads cun in'infecziun dal coronavirus. Tar ulteriurs cas manca anc il test dal labor da referenza a Genevra – la mesemna a mezdi aveva l'Uffizi da sanadad en quest connex discurrì da 39 cas. En pli dettia radund 200 cas da suspect e 300 persunas sajan en Svizra en quarantina. Quai vul dir che quellas persunas ston star en lur abitaziun e na dastgan betg avair contact cun autras persunas.

La situaziun è seriusa e vegn anc pli seriusa
Autur: Daniel KochManader da la partiziun per malsognas contagiusas

Fin uss èn surtut persunas giuvnas pertutgadas

Las persunas giuvnas che sa chattian uss en l'ospital, sajan surtut ospitalisadas perquai ch'ins possia uschia isolar ellas meglier. Sch'i na sa tractass tar quellas infecziuns betg dal coronavirus, na fissan quellas persunas betg ospitalisadas. I saja dentant da far quint, ch'i dettia il proxim temp er en Svizra cas pli grevs.

Grafica cun las cifras dals 04.03.2020.
Legenda: RTR, Grafica

Koch: «I va uss per proteger la populaziun pli veglia»

Fin uss èn vegnids testadas surtut persunas pli giuvnas. Quai haja er la raschun che la giuventetgna viagia dapli e tgira dapli contacts socials. La generaziun pli veglia saja fin uss vegnida schanegiada. Quai po tenor Koch dentant bainbaud sa midar. Las mesiras e recumandaziuns dal BAG han perquai surtut la finamira da proteger las persunas pli veglias.

A partir d'ina vegliadetgna da 65 onns creschia la rata da mortalitad pervi dal coronavirus numnadamain a moda rasanta, quai mussian las cifras or da la China.

Video
Koch: «Jau na crai betg, che nus faschain sin panica»
Or da News-Clip dals 04.03.2020.
laschar ir

1'000 tests per di

Actualmain haja la Svizra la capacitad da far radund 1'000 tests sin il coronavirus per di, ha ditg Koch sin ina dumonda da schurnalists. I saja dentant dad ir enturn a moda economica cun ils tests, er sch'igl haja il mument anc avunda da quels.

Video
Koch: «Nus avain avunda material per impedir il mender»
Or da News-Clip dals 04.03.2020.
laschar ir

Che la situaziun fa malsegira la populaziun, mussan las cifras dal mardi: Lura hai dà passa 2'000 telefons sin la hotline dal BAG e 3,7 milliuns clics sin la pagina d'infurmaziun online dal BAG.

Infurmaziuns per la populaziun

Chantun Grischun

Confederaziun

  • Telefon dal BAG 058 463 00 00 (durant 24 uras)

Infecziuns en passa 30 pajas europeics

Sco Daniel Koch ha ditg, saja la situaziun uss seriusa e daventia adina pli seriusa. Sin l'entir mund sajan radund 100'000 cas enconuschents, 3'000 persunas sajan mortas en consequenza dal virus. En Europa dettia cas en passa 30 pajais. I saja uss fitg impurtant da pigliar serius las mesiras instradadas.

La mesemna a las 13:30 ha il BAG anc ina giada infurmà davart la situaziun actuala da la derasaziun dal coronavirus en Svizra.

Italia serra scolas ed universitads

Nagina scola pli en l'Italia. Perquai ch'il Coronavirus sa derasa, serra l'Italia tut las scolas ed universitads en l'entir pajais almain enfin ils 15 da mars. Quai ha la ministra da scola confermà questa saira.
En l'Italia èn gia passa 100 persunas mortas pervi dal coronavirus e pli che 3000 èn infectadas.

Collavuratur da duana en Tessin s'infectà

Ina persuna da l'administraziun da duana a Chiasso Strada en il Tessin saja s'infectada cun il coronavirus. La persuna che na saja betg en contact cun clientella saja immediat vegnida en quarantina, ha communitgà il departament da finanzas.

Sch'i sa tractia d'in um u ina dunna n'è betg enconuschent. I vegnia sclerì cun tgi che la persuna saja stada en contact. Per ils collavuraturs sajan mesiras da segirezza vegnidas instradadas.

Purtret da la duana a Chiasso.
Legenda: Tar la duana a Chiasso è in collavuratur u ina collavuratura s'infectà cun il virus. Keystone

Scolar en il Tessin è s'infectà

En il Tessin è in scolar s'infectà cun il coronavirus. Ils contacts dal scolar hajan ins pudì reconstruir. Ils conscolars sco era las persunas d'instrucziun vegnian per duas emnas en quarantina.

En il chantun Tessin creschan cun quai ils cas d'infecziuns sin 7.

Swissmem fa quitads per l'economia

La derasaziun dal coronavirus metta sut squitsch l'industria svizra da maschinas, electro e metal. «Sch'ils impediments entras l'epidemia dal coronavirus ed er il franc svizzer resta uschè ferm, vegn la situaziun per l'industria da MEM critica», avertescha il schef da l'uniun da branscha Swissmem, Stefan Brupbacher. Las chadainas da furniziun da firmas sajan impedidas u interruttas cumplet.

Purtret da Brupbacher che guarda cun ina fatscha pensiva sin ses telefonin.
Legenda: Il schef da Swissmem, Stefan Brupbacher fa quitads. Keystone

2 ulteriurs cas en il chantun Sviz

En tut ha il chantun Sviz uss trais persunas ch'èn s'infectadas cun il coronavirus. Ellas sajan s'infectadas independentamain ina da l'autra. Nua ch'els pudessan esser s'infectads n'haja il responsabel da l'uffizi da sanadad betg declerà. Ins saja anc vid sclerir cun tgi ch'els sajan stads en contact en lur conturn. Ina da las persunas sa chattia en ospital, duas vegnian tractadas a chasa. Ellas sa chattina tuttas en in bun stadi da sanadad.

Mardi suentermezdi è er vegnì confermà l'emprim cas da corona en il Principadi da Liechtenstein.

Cassa da malsauns surpiglia custs

Il test per il coronavirus ston las cassas da malsauns pajar. Il test vegnia mess sin la glista da las analisas che las cassas stoppian surpigliar. La diagnostica dal coronavirus SARS-CoV-2 tutgia tar las mesiras recumandadas da l'uffizi per franar l'epidemia, ha communitgà l’Uffizi federal da sanadad.

Emprim cas en l'armada svizra

L'um ch'è s'infectà è stà en acziun en in curs da repetiziun a Wangen a. Aare a Berna. El saja stà da curt a Milaun. El saja isolà ed er ses camarats che sajan stads en contact cun el sa chattan en quarantina.

Swiss Football League sposta gieus

La Swiss Football League ha decidì ch'il manaschi da gieu da la Super- e Challenge League fa pausa fin ils 23 da mars. Sch'il scumond d'occurrenzas da la Confederaziun na vegn betg prolungà sur ils 15 da mars, cuntinuescha il campiunadi. Per las rundas 24 – 27 ed ils quartfinals da la Cuppa Svizra ston ins chattar novs termins.

Sessiun sut l'ensaina dal coronavirus

La sessiun a Berna ha er cumenzà sut l'ensaina dal coronavirus. Ils parlamentaris duain desister da dar il maun, s'embratschar u dar bitschs per salidar in l'auter.

Video
Dar il maun – u betg?
Or da RTR Social dals 03.03.2020.
laschar ir

RTR novitads 06:00+

Artitgels legì il pli savens

Nach links scrollen Nach rechts scrollen