Tut en tut è il dumber dals cas uschia creschì sin 31'555, communitgescha l’uffizi federal da sanadad BAG. Igl è il 5avel di en seria ch’il dumber è s’augmentà. Il venderdi eri anc vegnì annunzià 58 novas infecziuns, la gievgia 52 e la mesemna 44.
Fin ussa èn mortas 1'682 persunas ch’èn vegnidas testadas positiv sin il virus. Tut en tut èsi vegnì fatg 55'315 tests, tar 6,8% da quels è il resultat stà positiv.
Uffizi federal da sanadad appellescha
Il directur da l'uffizi federal da sanadad Pascal Strupler è entant sa drizzà a la populaziun via Twitter: Il dumber da las novas infecziuns creschia puspè. Quai saja preoccupant.
Ordavant aveva l'uffizi gia communitgà ch'ins stoppia surtut esser precaut tar picknicks e grilladas. I saja d'evitar da parter bavrondas u mangiativas e da tegnair distanza.
Grond interess per SwissCovid-App
L'interess per la SwissCovid-App che possibilitescha da persequitar enavos las infecziuns novas è grond. Fin oz han stgars 750'000 utilisaders installà l'applicaziun sin lur telefonin. La SwissCovid App datti dapi ils 28 da matg sco versiun da pilot e dapi la gievgia è ella pronta tuts.
Berset cusseglia tut tenor da purtar ina mascra
Il cusseglier federal Alain Berset vesa differents motivs per l'augment dals cas. D’ina vart vegnia testà dapli en Svizra, da l'autra vart hajan blers era pers in zic il respect da s'infectar, uschia Berset en la «Samstagsrundschau» da radio SRF. Il virus saja anc adina qua. Perquai saja vinavant fitg impurtant da tegnair la distanza e là nua che quai na saja betg pussaivel, saja propi da purtar ina mascra.
