Siglir tar il cuntegn

Header

audio
Co installar l'app da SwissCovid
Or da Actualitad dals 25.06.2020.
laschar ir. Durada: 02:53 minutas.
cuntegn

A partir dad oz La SwissCovid app è uss en funcziun

Dapi oz pon ins telechargiar l'app da SwissCovid sin il telefonin. L'applicaziun duai gidar da restrenscher la derasaziun dal coronavirus, scriva l'Uffizi federal da sanadad sin sia homepage. Ella cumplettescha il contact-tracing classic, cun persequir ils contacts ch'ins ha gì sco ultim, entras il chantun. La SwissCovid app duai gidar da franar las chadainas d'infecziun.

video
La SwissCovid app - co ina applicaziun sa gidar encunter il coronavirus
Or da RTR Social dals 25.06.2020.
laschar ir

Co funcziuna l'app?

Il diever da l'app è voluntari e na custa nagut. Dapli persunas che installeschian l'app e dovran ella e pli effizient ch'ella funcziuna per restrenscher il virus, scriva il BAG.

L'app registrescha sch'ins è vegnì insacura en contact cun ina persuna che ha era installà l'app. Sch'ins è stà insacura pli datiers che 1,5 meters dad ina persuna ch'è infectada cun il virus, e quai per pli ditg che 15 minutas, lura trametta l'app ad ins in messadi anonim. Sch'ins ei infectaus, indichesch'ins quai a l'app ed ils contacts ch'ins ha gì vegnan infurmads.

Tge far sch'ins survegn in tal messadi?

L'app propona ad ins da telefonar ad ina hotline da l'Uffizi federal da sanadad. Tgi che n'ha nagins sintoms, sa da principi lavurar vinavant. Mo sch'ins survegn in attest dal medi u in'ordinaziun uffiziala dad ir en quarantina, sto il patrun pajar vinavant la paja. Sch'ins ha sintoms pon ins ir a laschar testar. Il test da corona è gratuit per persunas che nizzegian l'app, quai ha il parlament decidì.

Co vegnan mias datas protegidas?

Dapi la fin matg èn hackers ed auters interessads vid testar l'app sin mancanzas da segirezza. L'entschatta zercladur ha il parlament approvà la basa legala per duvrar l'app ch'è vegnida sviluppada da la Confederaziun e la Scola politecnica federala. En la debatta en il Cussegl naziunal ha il minister da sanadad Alain Berset declerà ch'il resun saja per il pli stà positiv.

Impurtant da dir è che las datas na vegnan betg arcunadas en in lieu central, mabain mo sin il telefonin sez. Suenter trais emnas vegnan las datas mintgamai stizzadas.

RTR novitads 14:00

Artitgels legids il pli savens

Scrollar a sanestra Scrollar a dretga