Da l'onn 2000 enfin il 2021 èn en tut 15 persunas mortas tar accidents cun pendicularas. 207 persunas èn vegnidas blessadas en questa perioda da temp. Las cifras da l’Uffizi federal per statistica mussan ch’i dat ina leva digren d’accidents da persunas tar pendicularas ils ultims decennis.
Tenor las Pendicularas Svizras èn stadas en funcziun passa 2'000 implants da pendicularas l'onn 2021 – passa 500 da quellas en il Grischun. La branscha ha fatschentà en tut 17'583 emploiads ed emploiadas. Durant la stagiun d'enviern 2021/22 ha l'organisaziun registrà 25,4 milliuns primas entradas. Durant quest temp hai dà nov accidents en connex direct cun pendicularas.
Passagieras e collavuraturs
L’Uffizi federal per traffic (BAV) constatescha, ch’il traffic public è ina segira metoda da viagiar. Il rapport da segirtad 2021 mussa ch’ils accidents van enavos. Cunzunt ils passagiers n'èn betg savens involvids, dals accident èn cunzunt collavuraturs e collavuraturas pertutgadas. Tar las pendicularas na sa mussa quella differenza dentant betg, qua n’èn ils emploiads betg spezialmain periclitads.