Swisscom surpiglia Vodafone Italia per otg milliardas euros. Els hajan suttascrit il contract da cumpra. Quai ha communitgà il concern da telecommunicaziun svizzer. Swisscom vul metter ensemen il purschider da rait mobila talian cun sia societad affiliada «Fastweb». Grazia a questa fusiun resulta il segund grond purschider da telecommunicaziun en l’Italia.
L'acquisiziun vegnia probablamain ad esser terminada l’emprim quartal 2025, sch’ils regulaturs approveschan quai. In consentiment dals acziunaris da la Swisscom n’è percunter betg necessari.
E cun l’Italia n’èsi anc betg finì: La Swisscom e Vodafone Group examineschan er ina relaziun da fatschenta pli stretga. En quest connex sa tracti spezialmain d’ina collavuraziun pussaivla – er sur ils cunfins talians – en differents secturs sco IoT, servetschs e soluziuns d’interpresas, roaming ed ulteriuras tematicas.
Dapli dividenda
La surpigliada mainia ad in cler augment da la valur. Quai vegn a legrar ils acziunaris da la Swisscom, e cun quai surtut era la cassa federala: Il concern da telecommunicaziun svizzer vul augmentar la dividenda da fin ussa 22 francs sin 26 francs per aczia davent da l’onn 2026. Ins sminia in ulteriur augment da la dividenda ils onns suandants, hai gì num vinavant.
