Siglir tar il cuntegn

Header

cuntegn

Affera AutoDaPosta Cussegl federal duai survegliar pli fitg

Il Cussegl federal sto controllar pli fitg interpresas ch’èn liadas a la Confederaziun. Quai pretenda la cumissiun da gestiun dal Cussegl dals chantuns en ses rapport davart l’affera da l'AutoDaPosta.

Da sias examinaziuns tranter il favrer 2018 ed il settember 2019 resulta che la controlla da l’AutoDaPosta entras il Cussegl federal, l’UVEK e las ulteriuras autoritads cumpetentas saja stada manglusa. Er la repartiziun da las cumpetenzas na saja betg reglada cler avunda, uschia statti en il rapport.

Ils scleriments han mussà che l'UVEK e la Controlla da finanzas federala han gì almain dapi il 2011 enconuschientscha dal problem da l'AutoDaPosta SA, il problem d'esser confruntà cun gudogns. Malgrà quai n'hajan els fatg nagut, crititgescha la cumissiun da revisiun. Ch'ils gremis numnads hajan dentant savì da la pratica da cudeschaziuns illegala na po la cumissiun betg confermar.

Glista cun propostas

Ord ils resultats da lur examinaziun fa la cumissiun da gestiun 15 propostas al Cussegl federal. Tranter auter stoppia vegnir reglà en il futur pli cler, tgi ch’è responsabel per tge incumbensas. Il medem mument inoltrescha ella sis postulats ed ina moziun per mauns dal Cussegl federal.

La cumissiun è però er da l'avis ch'ils acturs cumpetents hajan reagì a moda commensurada suenter che l'affera è vegnida a la glisch. Ella è dentant er da l'opiniun ch'il Cussegl federal, l'UVEK e l'Administraziun da finanzas federala hajan agì defensiv quai che pertutgia l'intervenziun tar La Posta.

RR novitads 15:00