L'affera da spiunascha cun apparats da codar d'ina firma svizra duai vegnir sclerida dal tuttafatg. Quai pretendan pliras partidas. Cunzunt duai vegnir sclerì, schebain igl haja dà cumplizis. Er ina PUK, ina cumissiun d'inquisiziun parlamentara na vegn betg sclausa.
- La Parida socialdemocratica sa dumonda, davent da cura ch'il Cussegl federal era infurmà e sch'il servetsch d'infurmaziun da la Svizra aveva era enconuschientschas da questas operaziuns. La partida beneventa las mesiras introducidas.
- La Partida liberaldemocratica examinescha, sch'ella vul en la sessiun da primavaira betg far sezza la dumonda per ina PUK. Quai saja, tenor la president Petra Gössi, per lur partida ina «opziun seriusa».
- La Partida cristiandemocratica è da l'avis ch'igl è gist ed impurtant ch'il Cussegl federal sa fatschenta cun questa chaussa. Dapli na possian ins actualmain anc betg dir.
- La Partida populara svizra è preoccupada pervi da la reputaziun e pretenda scleriment en chaussa. La publicitad è d'infurmar transparent davart ils resultats da las retschertgas.
- L'organisaziun per la defensiun dals dretgs umans Amnesty International vesa problems cun la violaziun dals dretgs umans.
Actas èn per part anc adina serradas
Las actas davart las investigaziuns tar la Crypto AG, dals onns 90, vegnian per part anc oz tegnidas serradas. Il vice-schef dal servetsch d'infurmaziun svizzer, Jürg Bühler, ha argumentà quest pass cun datas da persunas che stoppian vegnir protegidas.
Plinavant saja in dossier davart las investigaziuns da la la Polizia federala ì a perder. Il servetsch d'infurmaziun da la Confederaziun haja pir uss udì da quai, vegn Bühler cità en il rapport. Il servetsch d'infurmaziun speria anc adina ch'il dossier saja be vegnì mess giu en il fauss lieu, ma ch'el vegnia puspè nanavant.
Firma da Zug Crypto involvida
L'emissiun dad SRF Rundschau ha fatg enconuschent che la firma Crypto cun sedia a Zug haja vendì onns a la lunga a plirs pajais apparats da codar manipulads, uschia che servetschs secrets americans e tudestgs hajan era pudì leger transmissiuns secretas dad auters stadis.
Dapli da quest tema – Tagesschau SRF dals 11.02.2020
RTR novitads 06:00