- L'immunitad dal Procuratur public partent Michael Lauber vegn annullada. Quai ha decis la cumissiun parlamentara responsabla cun 8 cunter 1 vusch.
- Igl è per la terza giada en l'istorgia che l'immunitad dad in dals commembers da las autoritads federalas vegn annullada.
La dumonda per abolir l'immunitad aveva tschentà il procuratur extraordinari Stefan Keller. El aveva lantschà l'entschatta avust in'inquisiziun penala cunter Lauber ed il president da la Fifa Gianni Infantino. Tranter auter renfatscha Keller als dus accusads abus d'uffizi. Il process sa drizza dentant era cunter il procuratur general dal Vallais Rinaldo Arnold.
Cunter Michael Lauber èn pliras accusaziuns penalas pendentas. Ad el vegn renfatschà d'avair privilegià Infantino tar ils inscunters nunprotocollads. Er il suspect che Lauber ha violà il secret d'uffizi n'è betg giud maisa.
Decisiun clera
La cumissiun dal Cussegl naziunal ha decis cun 8 cunter ina vusch d'abolir l'immunitad da Lauber, la cumissiun dal Cussegl dals chantuns aveva gia prendì avant duas emnas questa decisiun. Lauber n'è pia betg pli protegì d'ina inquisiziun penala. I saja en l'interess da las instituziuns pertutgadas, sco er da Lauber sez, da sclerir ils fatgs, han argumentà las cumissiuns.
La cumissiun da la dretgira duai uss nominar in procuratur public federal extraordinari. Il parlament duai decider durant la sessiun d'atun en chaussa.
Pass nunusità
Igl è pir la terza giada en l'istorgia che l'immunitad dad in dals commembers da las autoritads federalas vegn annullada. Il 1989 avevan las chombras annullà l'immunitad da la cussegliera federala Elisabeth Kopp. Il Tribunal federal ha dentant silsuenter acquittà Kopp.
L'ultim temp è l'immunitad vegnida annullada sulettamain ina giada – numnadamain tar l'anteriur cusseglier naziunal da la PPS Christian Miesch. El era involvì en «l'affera Kasachstan». Er qua n'hai dà nagina accusaziun. La procura publica federala ha mess ad acta il cas.
