Entaifer ils ultims 20 onns ha la Svizra dà ina mesa milliarda francs a l’Afganistan. Er suenter ch’ils Talibans hajan surpiglià la pussanza, duajan las subvenziuns vegnir pajadas vinavant. Quai ha confermà il Departament federal d’affars exteriurs envers las gasettas «Sonntagszeitung» e «Sonntagsblick».
Reponderar tscherts projects
La Direcziun da svilup e da collavuraziun DEZA examineschia uss, sche projects actuals stoppian eventualmain vegnir adattads. Partenaris da la Svizra sajan dentant gia stads activs en regiuns, ch’ils Talibans controlleschian gia daditg. Areguard l’agid al svilup è l’Afganistan in pajais prioritar da la Svizra.
Situaziun caotica a l'eroport da Kabul
La situaziun malsegira a Kabul ed a l’eroport da Kabul daventa adina pli problematica per tgi che vul bandunar il pajais. Ils Stadis Unids e la Germania averteschan lur burgaisas e burgais en l’Afganistan dad ir persuls a l’eroport da Kabul.
La Germania ha publitgà ina brev che cusseglia a Tudestgas e Tudestgs da restar a chasa pervi da la situaziun enturn l’eroport ed en l’entira citad. Tenor agenturas da novitads blocheschan anc adina millis persunas las differentas entradas da l’eroport da Kabul. La situaziun saja caotica. Ins audia adina puspè sajets e las forzas da segirezza dovrian gas lacrimogen.
