- La Svizra trametta suenter il terratrembel en il Haiti la sonda, in'equipa da sis persunas per gidar.
- Ils experts dal Corp svizzer per agid umanitar duain sustegnair l'acziun d'agid, che l'ambassada svizra a Port-au-Prince ha instradà suenter il terratrembel.
La Svizra trametta ina gruppa d’experts en il Haiti. In aviun cun commembers dal corp per agid umanitar saja partì la bun’ura da Berna, ha communitgà il Departament federal per affars da l’exteriur. En pli sustegnia la Confederaziun pliras ovras d’agid al lieu cun totalmain in milliun francs.
Davart dumondas d’agid da Sviras e Svizzers pertutgads n’hajan ins naginas enconuschientschas. Pervia da la situaziun difficila scusseglia il departament dapi plirs onns da far viadis en il Haiti. Il stadi caribic è in pajais da pais per la cooperaziun al svilup svizra.
Il dumber d’unfrendas suenter il grev terratrembel crescha entant vinavant. Las autoritads han fin uss confermà bunamain 2’200 morts. Inundaziuns e ferma plievgia en consequenza dal stemprà «Grace» impedeschian las lavurs da salvament.
