La Svizra ha a disposiziun avunda bun terren per arar. Cun radund 445'000 hectaras vegn la finamira minimala surpassada per stgars 2%. Quai mussa ina survista naziunala da l'Uffizi federal da svilup dal territori.
I giaja per las surfatschas essenzialas cun il pli grond potenzial da nutrir. Ellas duain far pussaivel il nutriment en situaziuns da crisa, e vegnan duvradas sulettamain per products vegetals: tartuffels, graun, ravun e ravas da zutger.
Sut il stritg èn 11% dal pajais, e 31% da la surfatscha agricula, segirads per culturas alternantas («Fruchtfolgen»). Ellas duain esser prontas aifer in onn per il diever da nutriment, e na duain betg vegnir duvradas u surbajegiadas. Per persuna stattan a disposiziun 506 meters quadrat.
Er sche la surfatscha vegnia surpassada, sajan ellas sut squitsch, hai num da l'uffizi. Il basegn da la societad per terren creschia. E quai pudess anc s'accentuar sche la populaziun e l'economia creschia vinavant. Las surfatschas per culturas alternantas èn da grond'impurtanza per la segirezza alimentara da la Svizra.
