L’impurtanza economica da las dunnas en l’agricultura è creschida ed er lur segirtad sociala è sa meglierada. Spezialmain dunnas giuvnas surpiglian adina pli savens funcziuns directivas, sco che l’Uffizi federal d’agricultura scriva en connex cun il studi publitgà. Uschia ha la mesadad da las dunnas giuvnas interrogadas inditgà da procurar en lur sectur da responsabladad per passa la mesadad da las entradas.
Cumpareglià cun ils rapports dal 2002 e dal 2012 saja evident che las rollas sajan uss repartidas pulit auter sin ils bains purils, scriva l'uffizi federal en il nov rapport. Las dunnas en l’agricultura occupan en media dapli che trais rollas, la dunna da chasa e mamma èn anc adina las pli impurtantas, uschia il studi. Spezialmain dunnas giuvnas sajan vegnidas pli segiras da sasezzas e surpiglian er dapli responsabladad per il manaschi. Cun il dumber creschent da manadras e da manaders da manaschis datti pia er dapli exempels feminins.
Igl è stada la terza giada che l'Uffizi federal d'agricultura ha fatg il studi davart la situaziun e la rolla da las dunnas en l’agricultura. Per il studi han 778 puras da l'entira Svizra respundì online. Vitiers hai dà quatter discussiuns da gruppa.
