Era sch'i saja normal ch'in virus muteschia, la mutaziun actuala dal coronavirus muntia novas sfidas en il cumbat da la pandemia – era per la Svizra. Quai ha ditg il minister da sandad Alain Berset il glindesdi a Basilea:
Anc n'haja il Cussegl federal betg decis novas mesiras ubain ina nova strategia, ha dentant precisà Alain Berset. Actualmain saja el cuntent che l'acziun da vaccinar cumenzia pass per pass en l'entira Svizra. Il minister da sanadad è sa preschentà oz a la medias a Basilea a chaschun da l'avertura d'in center da vaccinar cunter il coronavirus.
Be cun il vaccin vegnian nus tras la pandemia
Las quantitads dal vaccin sajan organisadas uschia, ch'ellas s'agmentian mintgamai. Plinavant sajan er anc ulteriurs vaccins en la pipeline. Per quels valian las medemas directivas sco per auters vaccins era, ha Berset accentuà.
Cumenzar a vaccinar vulan ins cun las persunas ch'èn en ristg. Suenter vegnia il persunal dal sistem da sanadad. Sche avunda persunas sa laschian vaccinar, possia quai esser in «game-changer». Il vaccin saja bain voluntari, dentant fitg impurtant. Tgi che veglia sa laschar vaccinar, duai er far quai. Be uschia possian ins cuntanscher ina meglra situaziun. Be cun il vaccin possian ins chattar ina buna via en questa pandemia.
