La midada dal clima ha laschà crescher fermamain il dumber da pertutgadas e pertutgads da la strucca da fain en Svizra. Avant 100 onns strusch enconuschev'ins ella tar nus, oz saja circa mintga tschintgavla persuna pertutgada.
Tenor l'Academia da las scienzas natiralas haja la midada dal clima effectuà che bleras plantas che provocheschan allergias dettian liber lur pollens pli baud e cun dapli intensitad. Ultra da quai favurisescha la midada dal clima la derasaziun da plantas invasivas sco l'ambrosia che chaschuna reacziuns allergicas.
La strucca da fain possia era avair fatg progress pervi da l’impestaziun da l'aria. Sche las plantas sajan stressadas pervi da nausch'aria produceschian ellas pollen ch'effectueschian reacziuns pli fermas. Ultra da quai po l'impestaziun da l'aria donnegiar la via respiratorica dals umans, quai promova asma e la strucca fain.
Custs da milliardas
Tenor il fegl d'infurmaziun eran l'onn 1926 approximativamain 0.8% da la populaziun allergica cunter il pollen. Oz vegni schazegià che var 20% da las persunas èn pertutgadas da quai. L'augment da la frequenza d'allergias è pia in fenomen global.
Quai haja ultra da las consequenzas per la qualitad da viver dals pertutgads er consequenzas economicas: «En Svizra cuntanschan els tenor stimaziuns in'autezza tranter 1 e 4 milliardas francs per onn», hai num en il fegl d'infurmaziun. En questa cifra èn cuntegnids tant custs directs per medicaments u per dimoras en l'ospital sco er custs indirects cun ina productivitad reducida e cun manchentar dis da scola e da lavur.
