Dal tegnair ensemen dependia il success da la Svizra, ha Gerhard Pfister ditg a l’entschatta da ses pled. Perquai saja in ferm center politic pli impurtant ch’insacura. Ed el ha manegià che la partida possia ir plain fidanza ed optimistica en las elecziuns.
Amherd tematisescha la neutralitad
La cussegliera federala Viola Amherd ha discurrì cun la secretaria generala Gianna Luzio davart l’onn da guerra en l’Ucraina. L’attatga russa fatschentia e fetschia fastidi ad ella, ha ditg la cussegliera federala. La Russia na respectia betg il dretg internaziunal ed ignoreschia in stadi suveran. Ella stoppia dentant era patratgar vi dals umans fugids e tut las unfrendas.
Viola Amherd ha era tractà la dumonda da la neutralitad. Ed ella ha fatg la differenza tranter il dretg da neutralitad e la politica da neutralitad. Tar il dretg sajan las reglas cleras. Tar la politica da neutralitad dettia in tschert spazi d’agir, ch’ins stoppia discutar.
Duas cleras parolas Gea
Las radund 250 delegadas e delegads han plinavant decidì las parolas per las duas votaziuns federalas dals 18 da zercladur. Tant la taglia globala minimala da l’OECD sco la lescha davart la protecziun dal clima n’èn betg stadas contestadas, per omaduas fatschentas hai dà grondas maioritads.
