Be persunas betg vaccinadas, adversaris da las mesiras da corona e simpatistants da la Partida populara svizra (PPS) han vuschà il november passà encunter la lescha da Covid-19. Persunas vaccinadas percunter han ditg per quasi 80% «Gea». Quai resulta da l'analisa da VOX da l'institut da perscrutaziun gfs.bern.
Da principi ha il svilup da la pandemia anc polarisà pli fitg ils ils champs pro e contra. Strusch ina gruppa ha però vuschà «Na» cun ina maioritad – ni ils giuvens, ni ils vegls, ni ils sanesters, ni ils dretgs. Uschè cler è er il resultat stà: 62% avevan vuschà per la lescha da Covid-19.
Corona ha er influenzà l'iniziativa da tgira
Tenor l'analisa da VOX dal gfs.bern, ha la discussiun davart las mesiras cunter la pandemia sco era cunter la lescha da Covid-19 influenzà la clera approvaziun da l'iniziativa da tgira: Uschia è la populaziun vegnida pli conscienta da la situaziun d'urgenza en la tgira e da la situaziun tendida en ils ospitals.
La solidaritad cun il persunal da tgira, ensemen cun il sustegn dal project da votaziun ord il champ senester-verd ed il center ha il suveran sivzzer per l'emprima giada insuma approvà in'iniziativa cun in «caracter sindical». L'iniziativa da tgira ha obtegnì in «Gea» da 61%.
