Siglir tar il cuntegn

Header

audio
Petra Gössi sa retira: Decisiun prudenta en l'interess da la partida – analisa dad Adrian Camartin
Or da Actualitad dals 14.06.2021.
laschar ir. Durada: 1 minuta 27 Secundas.
cuntegn

Analisa Decisiun prudenta en l'interess da la partida

Chalar duess ins cura ch’igl ei il pli bel, dian ins. Per Petra Gössi è quest plan dentant dà cumplettamain en l'aua. La PLD perda vinavant sustegn tar la populaziun, tar la cunvegna da basa cun l’UE ha l’agen cusseglier federal betg smatgà il nuf da reset mabain quel da stizzar e dumengia, tar la lescha da CO2, para ina gronda part da las commembras ed ils commembers betg d'avair gì gust da suandar la parola da la Partida liberaldemocratica e da sustegnair in cumpromiss en la politica dal clima.

Na, bel n'èsi propi betg stà las ultimas emnas per la presidenta. Adina pli vehementas las attatgas - saja en la de facto gasetta da partida NZZ sco era da collegas da la vart libertar-conservativa. Quests circuls n'han betg goutà la nova lingia pli ecologica da la partida - ina lingia iniziada da la presidenta avant las ultimas elecziuns federalas.

Perquai èsi chapaivel ed ina decisiun prudenta da Petra Gössi da dar giu la batgetta da la PLD. Avant ch’il foss tranter las alas politicas daventa nunsurmuntabel.

La tschertga d’ina nova presidenta ubain d'in nov president dat a la partida la schanza da reponderar sia posiziun, da discutar e da chattar in consens en tge direcziun che la partida fundatura da la Svizra moderna duai ir en l'avegnir.

Adrian Camartin

Adrian Camartin

Correspundent Chasa federala

Avrir la boxa da profil Serrar la boxa da profil

Adrian Camartin rapporta per RTR da Berna. Sco correspundent persequitescha el la politica naziunala, quai vul dir decisiuns dal Cussegl federal e debattas dal Parlament federal. El rapporta dentant era en general da temas svizzers ed en spezial dals Rumantschs en la Bassa.

RTR novitads 17:00

Artitgels legids il pli savens