En vista a la nova ordinaziun da chatscha, che va en vigur il prim da december 2023, ha la conferenza da las regenzas dals chantuns alpins preschentà in nov concept per la cultivaziun d’alps da chauras e nursas. I saja ina contribuziun pro-activa tar la nova ordinaziun. Finamira saja che tut las alps pon era en il futur vegnir cultivadas.
Tranter auter vulan ils chantuns da muntogna che la protecziun permanenta dals animals entras il pastur vegn renconuschida. Pia ch'i na dovra betg dispit adina saivs u chauns da protecziun. I saja impurtant ch'i vegnia lavurà ora per mintg’alp in concept individual tge ch'è pussaivel e tge betg, pertutgant la protecziun da nursas e chauras. Era duain ils manaders u manadras da las alps pudair decider tge mesiras da protecziun ch'i dovran. Il mument pudess quai dar conflicts giuridics cun ils pajaments directs. Perquai vul la conferenza da las regenzas laschar adattar ils reglaments.
I dovria alternativas, era cunquai ch'i na dettia betg avunda chauns da protecziun e dapertut na possian lez era betg vegnir en acziun pervia da la topografia. Tenor la conferenza da las regenzas dals chantuns alpins èsi impurtant ch'i dat uss discussiuns cun l’Uffizi d'ambient federal, che definescha mintg’onn ils criteris per la stagiun d'alp.
