In salvament entras il stadi saja uschia stà pauc realistic. Spendrar la CS avess duvrà in grond credit. Da quel temp avess quai chaschunà irritaziuns en la populaziun e betg gidà a la banca, uschia Maurer envers la SonntagsZeitung.
In concurs da la CS saja stà fitg pauc probabel, ha ditg Maurer a la «Sonntagszeitung». «La banca aveva uschè bler agen chapital ch'igl era cler ch'igl exista in interess da terzs», uschia l'anteriur cusseglier federal da la PPS. Cun la surpigliada da l'UBS saja quest interess alura era vegnì realisà. Per Maurer saja quai la fin finala la meglra varianta pussaivla.
Da principi sa participeschia il Cussegl federal pir a la fin cun in tal scenari, ha punctuà l'anteriur minister da las finanzas. «El na dispona gnanc da las infurmaziuns necessarias.» La responsabladad saja l'emprim la direcziun, alura il cussegl administrativ, la societad da revisiun e la surveglianza dals martgads da finanzas Finma. «La finala forsa era anc la Banca naziunala, tuts n'han betg agì en quest cas», ha el ditg.
«Signal fatal»
In salvament dal stadi da la CS avess signifitgà tenor Maurer in credit da pliras milliardas francs. Il management da la banca n'avess gnanca vulì quel. In credit avess er procurà per agitaziuns en la publicitad, è Maurer persvas.
Ch'il Cussegl federal avess pudì naziunalisar per dretg d'urgenza ina banca activa globalmain cunter la voluntad dal management saja plinavant «naiv». Ina intervenziun dal stadi avess dà in «signal fatal». Per las bancas signalisass quai ch'ellas pudessan prender senza problems grondas ristgas.
Stadi memia ferm per Maurer
Tar la CS giaja quai per la medema dumonda sco tar la pandemia da corona, ha ditg Maurer a la gasetta. «È il stadi responsabel per tut?» La pandemia ha tenor el rinforzà in trend: «Il stadi procura per tut, per propi tut.»
Maurer ha er affirmà en l'intervista remartgas ch'el ha fatg en connex cun las mesiras durant corona: «Jau m'occupesch surtut co ch'ins po metter e manipular l'entira societad en ina tala ipnosa», ha ditg l'anteriur cusseglier federal da la PPS.
Cun ipnosa manegia el che umans, ch'èn per exempel s'exprimids criticamain encunter la serrada da scolas, sajan vegnids fatgs tar «spinners senza responsabladad». Ils procediments durant la pandemia sajan stads aua sin ils mulins da quels che hajan pers la fidanza en il stadi. «Nus stuain far turnar quella glieud, uschiglio daventan els extremists», ha ditg Maurer.
