L’onn 2023 è il dumber d’incidents antisemitics en la Svizra tudestga e taliana creschì andetgamain. Spezialmain suenter las attatgas terroristicas dals 7 d’october èn ils incidents sa derasads tenor il pli actual rapport d’antisemitissem.
L'onn 2023 èn vegnids annunziads u observads totalmain 1'130 incidents antisemitics, l'onn precedent eran quai 910, sco che la Federaziun svizra da las communitads israelitas (SIG) e la Fundaziun cunter il rassissem e l'antisemitissem (GRA) han communitgà.
Las attatgas terroristicas da la Hamas radical-islamica da l’october 2023 han preschentà tenor il SIG in «trigger» per l’augment da tals incidents. Da 10 acts da violenza cunter umans giudaics registrads sajan set crudads sin il temp suenter las attatgas terroristicas. 114 da 155 incidents en il mund real èn vegnids registrads suenter questa data.
Er en il mund digital èn ils incidents antisemitics s'accumulads suenter l’eveniment, era sch’els èn creschids mo levamain en cumparegliaziun cun l’onn precedent. 459 da 975 èn capitads suenter ils 7 d’october.
