Armada Svizra - 39 annunzias d'extremissem tar l'armada
Il nov post per extremissem da l’armada ha dumbrà l’onn passà 39 annunzias d'extremissem. Quai mussa il rapport ch'è vegnì publitgà il glindesdi. Acts da violenza n'haja dà nagins. Il dumber da schuldads nua che l'armada ha instradà mesiras preventivas è restà cun quatter cas relativamain bass.
Las pli bleras annunzias hajan pertutgà extremissem da dretga. Mesiras preventivas haja il post stuì instradar cunter quatter persunas dal militar, pia mesiras sco controllar la persuna u prender davent a quella l’arma.
Acts da violenza u eveniments relevants per la segirezza n’haja dà nagins.
L’onn avant aveva il post per extremissem da l’armada survegnì 55 annunzias. In motiv ch'il dumber è sa reducì pudess esser tenor l'armada la pandemia da corona.
