L'Armada Svizra survegn in battagliun da cyber. Quai ha decis il Cussegl federal. Il battagliun duai s'occupar davent il schaner 2022 cun las sfidas en il sectur da cyber. Quellas vegnian adina pli cumplexas. I mondia cunzunt per analisar attatgas sin l'infrastructura dad IT.
Part dal battagliun da cyber duai esser il persunal da l'armada ch'haja gia experientscha civila u academica en il sectur da cyber, sco er persunas ch'han frequentà la scolaziun da cyber da l'armada durant la scola da recrut. Quella datti dapi il 2018 e dura 40 emnas.
Plinavant fa il Cussegl federal pliras pitschnas adattaziuns tar l'armada en il sectur da la scolaziun operativa.
