En Svizra è l'onn passà la violenza cunter persunas pli veglias creschida e quai per 23%. Quai ha communitgà il post independent da recurs per la vegliadetgna (Uba). Dapli che 300'000 persunas veglias sajan pertutgadas mintg'onn da maltractament ed abus. Pli pauc che 5% dals maltractaments vegnian rapportads tar posts spezialisads. L'onn passà èn ils posts vegnids contactads 604 giadas.
Quai che capita en il privat saja durant crisas e pandemias anc bler zuppà, avertescha l'Uba. Las schluccadas da las mesiras da corona sajan dentant stads bun per che terzas persunas han puspè pudì far stim pli bler. Il scleriment saja surtut fitg impurtant.
Umiliaziun, smanatscha, retratga d'amur
En 53 da totalmain 99 cas èn las persunas pli veglias stadas pertutgadas da maltractament e d'abus. La plipart eran dunnas sur 80 onns. Surtut hani suffrì da maltractament psichic sco umiliaziun, smanatscha, retratga d'amur, critica, plirs dis da taschair u massivas reproschas. Cunzunt las negligientschas sajan autas cun 46 cas.
