Ils urizis da glindesdi saira èn sa muventads sur il Giuria, la Svizra nordoccidentala sur Lucerna, Zug e Turitg en direcziun Lai da Constanza, scriva SRF Meteo. Passa 18'000 chametgs haja dà il glindesdi saira.
Blers donns en ils chantuns Lucerna e Zug
En il chantun Lucerna èn stads bunamain 300 pumpiers en acziun. Tranter las 18:00 e las 19:30 ha la polizia dal chantun Lucerna survegnì 115 annunzias da donn. Dasper plantas derschidas èn stadas inundads tschalers e sutpassadis. Er la polizia da Zug ha annunzià sin Twitter che tschalers, garaschas sutterranas e vias sajan sut l'aua. Plirs lieus han annunzià donns e per part hai dà granella da grondezza da ballas da golf.
Tenor indicaziuns da la polizia è la staziun da Rotkreuz stada il glindesdi saira sut aua pervi dals ferms urizis. Il traffic da tren ha per part stuì vegnir interrut. Tranter Rotkreuz e Cham sco er tranter Rotkreuz ed Immensee èn cursads bus da remplazzament.