Siglir tar il cuntegn

Header

cuntegn

Autos senza manischunz Charrar automatisà – lunsch davent u prest mintgadi?

Autos moderns possedan adina dapli assistents che duaian simplifitgar il charrar. En l'avegnir dentant pudessan autos charrar dal tut sulets.

Pilots automatisads èn gia ina realitad en blers autos moderns. E tuttina dovri en quels autos anc adina il manischunz. Dal tut san autos anc betg charrar sulets. Quai pudess dentant daventar realitad en l'avegnir. La branscha d'autos investescha adina dapli en autos automatisads. La concurrenza è gronda, mintgin che vul esser l'emprim che introducescha l'auto autonom sin la fiera.

Ina revoluziun che dovra anc inqual midada

Tenor Anton Keller dal Touring Club Svizra vegnan l'emprim autos sin la fiera che pon far omadus. Pia charrar autonom e cun manischunz. Per che quai daventia realitad sto dentant anc inqual chaussa sa midar. Tgi surpiglia la responsabladad e co pon ins differenziar tranter accidents chaschunads dad in manischunz ed accidents che l'auto ha chaschunà? Quai èn tut dumondas che ston vegnir scleridas ord vista giuridica.

Era ils autos ston anc far inqual svilup. I dovra dapli e megliers sensurs ed in barat da datas tranter ils autos. Anton Keller manegia che l'emprim auto autonom pudess vegnir sin la fiera en 10 onns.

RR actualitad 08:00