Cun avrir ils cunfins tranter ils stadis da l'Uniun europeica ed ils stadis d'Efta vala puspè la cumplaina libra circulaziun da persunas. Burgais da stadis terzs che vivan en tals pajais pon er puspè traversar ils cunfins, ston dentant mussar ina conferma da dimora.
Er sch'ils cunfins èn puspè averts: Il Cussegl federal cusseglia anc adina da be ir en l'exteriur sche quai sto propi esser.
Germania avra 24 uras pli tard
La Germania avra ses cunfins in di pli tard, pia la notg da glindesdi sin mardi. Raschun è tenor il Secretariat da stadi per migraziun, da natira giuridica. I saja dentant betg probabel che burgais svizzers vegnian tramess enavos dals cunfins.
Turissem da cumpra spetgà en Germania
Sur cunfin en Germania spetgia il commerzi en detagl gia vess sin ils turists da cumpra. Viadis da cumpra èn stads scumandads durant il temp da corona. Entras quai èn las svieutas dals detaglists en il sid dal pajais ids enavos fermamain. En il commerzi da victualias hai dà ina reducziun per 30% fin 60%.
Ils detaglists tudestgs spetgan perquai puspè ina ferma dumonda cura ch'ils cunfins s'avran. Per collavuraturs da la duana saja l'ultim temp dentant stà in levgiament. Blers spurtegls da service hajan pudì restar serrads. Là surlavuran collavuraturas e collavuraturs numnadamain ils formulars per ils turists da cumpras che survegnan enavos la taglia sin la plivalur.
