La societad aviatica Swiss prevesa grondas midadas, fin a 650 plazzas a temp cumplain vul il concern stritgar. Vitiers duain var 1'000 plazzas a temp cumplain crudar davent fin la fin da quest onn, cun betg remplazzar persunas che bandunan l'interpresa voluntarmain, u che van en pensiun. Quai a communitgà la Swiss.
Er la flotta duai vegnir restructurada
Gia avant in'emna aveva la Swiss communitgà ch'ins fetschia il patratg da stuair reducir il dumber d'aviuns. Uss è la decisiun fatga, cumpareglià cun il 2019 duai la flotta daventar 15% pli pitschna. Questa decisiun haja cunzunt ina influenza sin il dumber da sgols a mesa e lunga distanza.
Cun las mesiras che stattan en connex cun la pandemia spera la Swiss da pudair spargnar var ina mesa milliarda francs.
Sindicat n'è betg cuntent
Il sindicat VPOD ha communitgà, ch'el veglia mirar che la Swiss fetschia anc ina giada patratgs davart questa strategia da risico. Studis actuals mussian numnadamain buns scenaris per il futur da l'aviatica. Gia a la fin dal 2021 possian ins probabel cuntanscher in medem nivel en il traffic aviatic sco avant la crisa, ha communitgà il sindicat.
