L’onn passà èsi stà pli quiet en las salas da naschientscha en Svizra ch’er gia: vers 10% damain pops èn naschids il 2022 en cumparegliaziun cun l’onn precedent. Quai mussan las cifras da l’Uffizi federal da statistica da schaner enfin november. Ellas èn bain pir provisoricas, tenor l’experientscha vegnan anc annunziads in pèr naschientschas. Il trend è però cler.
Tge èn motivs pussaivels per la sminuziun?
Pèrs cun giavisch d’avair uffants han nizzegià il temp da corona l’onn 2021. «Il giavisch d’avair uffants è vegnì preferì uschia, quests uffants n’èn consequentamain betg vegnids sin il mund l’onn 2022», di Daniel Surbek, schefmedi da la clinica da dunnas da l’Inselspital da Berna ad SRF.
La pandemia e las mesiras prendidas sco homeoffice, restricziuns dal moviment e midadas dal cumportament da temp liber hajan gì per consequenza che blers pèrs sajan sa fatschentads intensivamain cun il tema giavisch d’uffants. Quai ha manà al Peak da naschientschas l’onn 2021.
Fertilitad na s’augmenta betg
In motiv da far quitads per la fertilitad tar umens e dunnas na datti betg. Las spezialistas ed ils spezialists na constateschan betg in augment da pèrs cun in giavisch d’uffants nunademplì.
«Nus vesain che las naschientschas èn puspè vi da crescher l’entschatta da l’onn 2023.» Subrek va da quai anora, che las cifras excepziunalas durant la pandemia sa guliveschan en il decurs da l'onn.
Il coronavirus sez n’ha nagina influenza sin la quota da naschientschas
Excluder po il schefmedi Surbek che la quota da naschientschas bassa stat en in connex cun la vaccinaziun cunter Covid u cun in'infecziun da corona. Quai saja vegnì examinà avunda. In sguard sur ils cunfins da la Svizra mussa in maletg sumegliant en Germania: Là è il dumber da naschientschas sa reducì per 8% il 2022. La Svizra n’è puncto «baby-Baisse» – il sbassament dal dumber da naschientschas – pia betg in cas spezial.
