Siglir tar il cuntegn

Header

cuntegn

Baselgia Benedir pèrs omosexuals correspunda a giavisch d'uvestgs svizzers

Spirituals catolics dastgan danov era dar la benedicziun a pèrs omosexuals. Quai ha la congregaziun da cretta vaticana communitgà glindesdi – quai cun approvaziun expressiva dal Papa Francestg.

Correspunda al giavisch dals uvestgs svizzers

La conferenza dals uvestgs svizzers reagescha positiv sin quai. Questa decisiun correspundia al giavisch dals uvestgs svizzers per ina baselgia averta che piglia serius la situaziun da relaziun e las accumpogna. La benedicziun saja in regal da Dieu, uschia ils uvetgs svizzers, che tutgia a tut ils carstgauns che la vulan.

Cun quest pass da pussibilitar la benedicziun da pèrs en diversas situaziuns da relaziun, renconuschia la baselgia quest giavisch per tuts. Quai mussia che la baselgia porschia plaz a tuts.

La lètg resta vinavant be tranter um e dunna

Papa Francestg aveva gia l'atun scrit en ina brev ch'el na refusia betg fundamentalmain benedicziuns per pèrs omosexuals. Tgi che giavischa la benedicziun, ha scrit Francestg lezza giada, dumondia en la confidenza da Dieu per l’agid da quest per pudair viver meglier. Questa dumonda na dastgia betg vegnir refusada da la baselgia.

Ins stoppia perquai ponderar, sch'i possia dar furmas da benedicziun, senza intermediar in'imaginaziun fallida da la lètg. Regulaziuns uffizialas en chaussa entras uvestgieus u conferenzas episcopalas ha il papa dentant refusà. La lètg saja ina colliaziun tranter um e dunna.

RTR novitads 15:00

Artitgels legids il pli savens