Siglir tar il cuntegn

Header

cuntegn

Baselgias ed abus sexuals Dapli cas d'abus che pensà en la Baselgia evangelica en Germania

En Germania hajan spirituals da la Baselgia evangelica commess millis cas d'abus sexual. Quai resulta d'in studi d'in team da perscrutaders independents che la Baselgia sezza aveva incumbensà. Il studi discurra da 2’225 unfrendas d'abus dapi il 1946, e passa 1’200 delinquents probabels. Las unfrendas sajan quasi tuttas masculinas, e tar 40 pertschient dals delinquents sa tractia da plevons.

Questas cifras sajan dentant be la «testa da la muntogna da glatsch», han ditg ils perscrutaders. Per il studi n'han els numnadamain betg pudì evaluar tut ils documents persunals dals plevons e diacons. Ina calculaziun approximativa vegnia sin passa 9'000 unfrendas. 

La Baselgia refurmada en Svizra vul lavurar si cas d’abus

Il december 2023 ha la presidenta da la Baselgia evangelica refurmada da la Svizra, Rita Famos, annunzià envers SRF, ch'era els examineschian schebain e co la Baselgia duai elavurar eventuals cas d'abus sexuals. Ella è sa mussada persvadida ch’i dettia era en sia baselgia blers cas d’abus.  

Rita Famos
Legenda: Keystone

Er en la Baselgia evangelic-refurmada haja dà cas d'abus betg tematisads ed ins haja guardà davent memia ditg. Famos ha dentant quintà che quest problem saja main vast che tar la Baselgia catolica. Ins haja drizzà en in post d'annunzia per cas d'abus. Era in agen studi naziunal en Svizra sco era pajaments a victimas sajan en discurs.

Questa valitaziun ha Rita Famos er fatg sin fundament d'in studi da la Baselgia evangelica tudestga, dal qual ils resultats èn vegnids publics uss. Ils resultats veglian ins nizzegiar per metter ad acta ils agens concepts da protecziun, ha Famos ditg plinavant.

audio
Per tadlar: las novitads da las 16:00
ord RTR Audio dals 25.01.2024.
laschar ir. Durada: 2 minutas 30 Secundas.

RTR novitads 17:00

Artitgels legids il pli savens